Алматыда мектеп мұғалімдерінің спартакиадасы өтеді

Қарашаның 2-і күні «Спорттық Алматы» бағдарламасы аясында Алматы қаласының жалпы білім беретін мектептерінің мұғалімдері арасындағы спартакиаданың қалалық кезеңі өтеді, деп ақпараттық және спорттық ХАБ хабарлайды.  
 
Жарыс № 200-ші мектеп–гимназиясының спорт залында (Шұғыла ықшам ауданы, 345/3 үй) тоғызқұмалақ, волейбол, арқан тарту, шахмат, гір тасын көтеру спорт түрлерінен өткізіледі. Басталуы 10:00-де.  
 
Оған тек жалпы білім беретін мектептерінің мұғалімдері ғана қатыса алады. Қатысушылардың жасы шектелмейді.  
 
Жеңімпаздар мен жүлдегерлер диплом, медальдар және сыйлықтармен марапатталады.
 
Спартакиаданың басты мақсаты жалпы білім беретін мектептерінің мұғалімдері арасында салауатты өмір салтын насихаттап және үздік ұжымдарды анықтау болып табылады. «Спорттық Алматы» бағдарламасы алып шаһардағы бұқаралық спортты дамытуға бағытталған.